Moderatoren: Zythophilus, marcus03, Tiberis, ille ego qui, consus, e-latein: Team
Veris ad imperia
Renascuntur omnia,
Amoris prooemia
Corda premunt saucia
Querula melodia
Gratia praevia,
Corda marcentia
Media.
Vitae vernat flos
Intra nos.
Suspirat luscinia,
Nostra sibi conscia
Impetrent suspiria,
Quod sequatur venia;
Dirige, vitae via,
Gratia praevia
Viae dispendia
Gravia.
Vitae vernat flos
Intra nos.
Ad Neaeram.
Cum tu candida sis magis ligustro,
Quis genas minio, Neaera, tinxit?
Quis labella tibi notavit ostro?
Unde sunt capiti aurei capilli?
Quis supercilii nigravit arcum?
Quis faces oculis dedit potentes?
O quies animi laboriosa!
O labor nimium mihi quiete!
O amarities petita votis,
Qua mori sine amem volens lubensque!
De suo amore
Iactor, dispereo, crucior, trahor huc miser atque huc,
Ipse ego iam quis sim nescio aut ubi sim:
Tot simul insidiis premor undique: proh dolor! in me
Saevitiae Cypris dat documenta suae.
Saevitiae documenta suae dat, ego hanc tamen unam
Depereo, utque nocet, sic libet usque sequi.
Qua siquis miserum solam me liberet horam,
Hic mihi sit Phoebo doctior et melior.
Mitglieder in diesem Forum: Majestic-12 [Bot] und 19 Gäste