De tempestate

[Sauron]

Salvi sitis,

omnes non ignoramus nives cadentes praedictas esse. Ego in agris incolo, itaque domo exire difficilis est.

Quid de tempestate in regionibus vestris?

[consus]

Contecta est gelidis nivibus Rhenania tota

Horriferoque gelu corpora nostra rigent.

[Tiberis]

obduxere nives albo velamine campos.

quae modo deciderant , nunc pluviis pereunt.

[consus]

Arva viae silvae niveo sub vellere lugent:

Sed scio: ver veniet moxque recedet hiems.

[consus]

Ventus nunc niveos per arva floccos
Propellit: nivibus repleta terra
Brumalique gelu ligata stagna.
Amnis Rhenus et ipse mox gelascet.

[Zythophilus]

De gelido uersus caelo scripsere sodales.

Exemplum sequitur distichon ecce meum.

Quae misere niues, nunc imbrem nubila mittunt.

Frigida mox lapsas aura gelabit aquas.

[Zythophilus]

Nobis hiems miraculum tulit: Ninguit!
Quid nunc fiat, cum res noua est, rogo. Ninguit!
Fert unaquaeque brumam hiems niuesque acris,
tamen stupet mirans homo niuem: „Ninguit!“

[consus]

Raro continuis nivibus Rhenania gaudet:

Raro Nix! igitur proferet ore sonum.

[Tiberis]

dicebant calefactione caeli
raras atque breves nives futuras.
mirum est: mole nivis gemunt Britanni
insueti nivium, gelu laborant
acri atque insolito ultimi Sinenses.
tempus frigoris et gelationis
invisum est mihi semper et molestum,
morti quod simile est suo rigore.
sermones minime mihi probantur
istorum, quibus id malum videtur,
paulo si calefactus esset orbis.

[consus]

Dictis his Thybris amnis nos relaxat:
Diffugere gelu rigorque durus,
Spes mentem nova nunc replet refectam.

[Tiberis]

caeli cum nimium putent calorem,
persuadent populo viri "periti"
ipsos hanc calefactionem iniquam
effecisse homines. nec audiuntur
argumenta probata ceterorum,
tali qui renuunt opinioni.
utcumque est: calefactione caeli
numquam adhuc populus dolebat ullus,
sedes his calidae fuere gratae
omni tempore , qui novas petebant.
summumne esse malum putemus, ante
quondam quod fuerat bonum et probatum?
quis nostrum, nisi degit otiosus
montanis modo ferias in oris ,
tanta insania erit, suapte sponte
ut frigus cupiat geluque triste?

[consus]

Ecce nives Zephyrus canas glaciemque resolvit:

Sed ver esse nego moxque redibit hiems.

[Tiberis]

o gratam Zephyro terram ! Rhenania felix!

frigore eheu! foedo Styria tota riget.

[consus]

Omnes hic pluviis nives solutae,
Quamvis ver placidum moretur ipsum
- - -

[Zythophilus]

Nec nimium frigus premit arua et decidit algor.

Nunc est, qualis hiems his solet esse locis.