von Tiberis » Mi 4. Jul 2007, 15:51
Tiberis cunctis amicis, imprimis autem Conso suo s.d.p.
Videant consules! Ex animo tibi assentior, quamquam eos, quibus res publica commissa est, in tanto terroris periculo minime saluti civium adhuc consuluisse mihi persuasum est. illos, quos summis viribus securitati civium studere oportet , consiliis pravis atque temerariis vera pericula augere potius quam minuere apparet. Nam quaerendum est, num ii, qui rei publicae Britannicae ( ut hoc utar exemplo) praesunt, saluti civium suorum consulant, cum nimis oboedienter Americanos in bello gerendo adiuvant. Quaerendum est, num civibus saluti fuerit, quod in tanto terroris periculo regina Britannorum Salmanum Rushdie, quem certa de causa multis mahometanis invisum esse constat, in ordinem equestrem recepit. Territoribus lacessendis periculum non minuitur, nisi forte credas incendium igne exstingui posse.
“at vim vi repellere licet.†– est ita. Tamen status civitatis Americanae iis documento sit, qui putant terrorem Islamicum vi armisque cohiberi posse. Nam nemo fere est, qui affirmet Americanos, licet multum profecerint in ictibus repellendis, hoc tempore tutiores esse quam antea. Russorum quoque clades, quam in Afghanistania acceperant, iis sit documento ; ceterum ii, qui tunc eos adiuverint, qui contra Russos « infideles » pugnaverunt, de se ipsi queri debent ; scires humanitatem ac democratiam apud eos nihil valere.
Optime valete !
ego sum medio quem flumine cernis,
stringentem ripas et pinguia culta secantem,
caeruleus Thybris, caelo gratissimus amnis