Factum est per liquidum nobis iter aera ad urbem,
quam geminum regem constituisse ferunt.
Nobilis Acropolis nobis scandatur, ut est mos,
candida ubi summae stant sacra fana deae.
Maxima in Acropoli fecerunt saecula damna,
suntque aequata solo candida tecta iugi,
et quae noluerat caecis Mars uertere telis,
fur artem cupiens nobilis inde tulit.
Quae fuerant fanis, habet ornamenta noua aula,
ne noceat statuis imber et acris hiems,
ni rapuere loco lapides et saxa Britanni,
museis ut opes sculptaque saxa darent.
Magnifica intrantem populum propylaea salutant,
nec procul armipotens diua Minerua fuit.
Cui non sunt alae, minimum Victoria templum,
posteritas uersum quod recreauit, habet.
Magnus Erectheas princeps iam non habet arces,
primus ubi fertur rex iacuisse Cecrops.
Ecce puellarum posita est hic saxea turba,
cum reddi patriis sedibus una uelit.
Qua uersante procul remanentes quinque sorores
exaudire potes nocte nigrante queri.
Hostibus expulsis ibi sunt delubra refecta
uersa graui bello Xerxe iubente prius.
Hic fuerat tectum, quod ferrea dona tenebat,
et tua – nil mansit -, Prosope pulchra, domus.
Hac regione uiret, dea quam donauit, oliua,
semper uti bacae Pallade dante forent.